रसियाले इतिहास लेख्दा स्पेन टाइब्रेकरको शिकार

मस्को(एजेन्सी)-आयोजक रसिया क्र्वाटरफाईनल प्रवेश गर्दा स्पेन भने टाइब्रेकरको शिकार हुदैं विश्वकपबाट बाहिरिएको छ । टाइब्रेकरमा ४-३ गोलमा पराजित हुदैं स्पेन बाहिरिदाँ रसियाले भने नयाँ इतिहास लेखेको छ ।

कोके र आइगो अस्पासको पेनाल्टीलाई रसियन गोलकिपरले सेभ गरेपछि स्पेनले क्र्वाटरफाईनल खेल्ने सपना त्यहीबाट टुंगिएको छ । आन्दे्रस इनिष्टाले शुरुवाती पेनाल्टीलाई गोल गर्दै स्पेनलाई लय देखाए । जेरार्ड पिके र सर्जियो रामोसको पेनाल्टी गोलमा परिणत भयो ।

रसियाका फेडर स्मोलोभ, सर्गेय इनाग्सेभिच, अलेक्जण्डर ग्लोभिन र डेनिस चेरेसिभको प्रहार गोलमा परिणत भएपछि रसियाले घरेलु मैदानमा क्र्वाटरफाईनल खेल्ने सौभाग्य पायो । निर्धारित र थपिएको समयमा समेत बारबरी भएपछि निर्णय पेनाल्टी सुटआउटमा गरिएको थियो ।

उपहार गोलबाट लिएको अग्रतालाई जोगाउन नसक्दा १-१गोलको बराबरीसँगै निर्धारित र थपिएको आधा घण्टाको समयमा गोलरहित हुदाँ भाग्य टाईब्रकेरमा लिईयो । १२ औं मिनेटमा सर्गेय इनाग्सेभिचले सर्जियो रामोसलाई रोक्ने क्रममा आफनै खुट्टामा लागेर बल पोष्ट भित्र छिरेको थियो ।

तर स्पेन अभागीसिद्ध भयो । हेडिङ गर्न उफ्रिदा रसियन खेलाडीले हानेको हेडिङ बल जेरार्ड पिकेको हातमा लागेपछि रेफ्रीले पेनाल्टीको अवसर दिए । पेनाल्टीलाई अर्टेम डयुबाले ४१ औं मिनेटमा गोल गर्दै बराबरी गरे । जुन पेनाल्टीले रसियाको भाग्य पेनाल्टी सुटआउटसम्म पुर्याउँदै अन्तिम आठमा आफनो स्थान सुरक्षित बनायो ।